A queimada

Receita da queimada

queimada

Ingredientes: Augardente, azucre branco fino, cortizas de limón e algúns grans de café.

Preparación: Nun recipiente de barro cocido, vértese o augardente e o azucre, na proporción de 120 gramos por cada litro de líquido. Engádense mondaduras de limón e os grans de café.
Remóvese e plántaselle lume, cun cazo no que previamente colocariamos un pouco de azucre con augardente. Moi amodo, achégase ao recipiente ata que o lume pase dun a outro.
Remóvese ata que o azucre consúmase.
No mesmo cazo bótase un pouco de azucre, esta vez seco, e colocándoo sobre a queimada móvese ata convertelo en almíbar, que se verte sobre as chamas e, removéndoo, esperamos a que as chamas teñan unha cor azulada.

Conxuro:

Mouchos, cbrujo2oruxas, sapos e bruxas.
Demos, trasgos e diaños,
espritos das nevoadas veigas.
Corvos, pintigas e meigas,
feitizos das menciñeiras.
Podres cañotas furadas,
fogar dos vermes e alimañas.
Lume das santas Compañas.
Mal de ollo, negros meigallos,
cheiro dos mortos, tronos e raios.

Ouveo do can, pregón da morte;
fuciño do sátiro e pé do coello.
Pecadora lingua da mala muller
casada cun home vello.
Averno de Satán e Belcebú,
lume dos cadavres ardentes,
corpos mutilados dos indecentes,
peidos dos infernales cus,
muxido da mar embravescida.
Barriga inútil da muller solteira,
falar dos gatos que andan á xaneira,
guedella porca da cabra mal parida.

Con este fol, levantarei as chamas deste lume
que asemella ó do inferno
e fuxirán as meigas a cabalo das súas escobas,
índose bañar na praia das areas gordas.

¡Oíde, oíde! os ruxidos que dan as que
non poden deixar de queimarse
no augoardente quedando así purificadas.
E cando esta brebaxe baixe polas nosas gorxas,
quedaremos libres dos males
da nosa alma e de todo embruxamento.

Forzas do Ar, Terra, Mar e Lume,
a vós fago esta chamada:
Si é verdade que tedes máis poder que a humana xente,
eiquí e agora, facede que os espritos dos amigos que estean fóra,
participen con nós desta queimada.